Queremos destacar o compromiso incansable de Veri Pazos a prol dun ensino público de calidade, imprescindible para unha sociedade democrática, e polos dereitos das persoas LGTBI+, dos que foi un gran valedor.
Profesor de secundaria e vinculado ao sindicato desde hai case vinte anos, Veri Pazos desempeñou distintas responsabilidades no ámbito da Federación do Ensino, como a comunicación, a acción sindical ou as actuais de organización e afiliación.
Alén do seu incansable labor sindical, Veri Pazos foi tamén un destacado activista LGTBI+, tanto no interno do sindicato como en colaboración con outras organizacións.
Verísimo Pazos, Veri, Breixo
Hoxe faleceu un amigo, un compañeiro. Faleceu unha referencia do sindicalismo de clase de CCOO.
Veri era profesor da especialidade de Matemáticas, pero a súa sensibilidade achegábao a todo tipo de artes. Foi un home do Renacemento, con dotes para a música, a pintura, a escultura, o cine e, especialmente, a fotografía.
Váisenos o compañeiro da axuda constante, sempre ao carón, sempre todo corazón. En CCOO perdemos un piar básico pero a vida perde un ser marabilloso.
Loitador do sindicalismo de clase. Loitador das liberdades LGTBIQ+. Loitador, en xeral, contra as inxustizas e a prol dos débiles.
Coma sempre, vanse os que non deben, vanse os que non o merecen. Vaste ti, compañeiro, moito antes do que sería esperable e natural. Vaste sen facer ruído, coma sempre, pero deixando un profundo baleiro nos nosos corazóns.